السلاااااام عليكم وكيف الحال وان شاءالله رمضانكم وعيدكم كانو على أحسن حال
اليوم حبت نتكلم في موضوع أنا نشوف فيه مهم , يعني وجهة نظر .
من سنة تقريبا أو أكثر نمشي للخدمة نشوف في شخص من الناس اللي العامة نقولولهم أمن يعني كل مهمته إنه يوقف قدام المبنى متع الخدمة ويرد باله من الماشي والجاي من الساعة ثمانية الصبح للساعة اتنين الظهر , لفت إنتباهي الولد مش كبير وبسم الله ماشاءالله مواعيده مضبوطة كأنه متربي في الصين يعني بصراحة ماشفتش هكي قبل , وعمري ماشفته يشرب في قهوة والا مسيب مكانه وخاش يهدرز ولا حتى يدخن ولا شي شي شي , هذا كله طبعا المفروض إنه يكون طبيعي .
اللي استغربته أكثر إنه حتى لما في ناس واقفة جنبه مايتكلمش معاهم طبعا قصدي رجالة لان الطبيعي انه لو لاهي بخدمته مش وقت تهدريز مع بنات .
المهم , إني يومها ماشية للخدمة وانا نازلة من السيارة اكتشفت فيه شي أول مرة نلاحظه .... لقيته يهدرز!!!! اول مرة , والمفاجأة انه طلع يتكلم بلغة خاصة جدا لغة مايعرفها حد إلا هو والناس اللي زيه ..الشاب اللي محافظ على واجبه وكنت نتمنى اني نعطيه وسام على انضباطه في شغله طلع أصم .
مش عيب ولا حرام ولا وجعني لانه أصم لالالالا لان هذا كله معاطي من عند الله واحد عنده وواحد ماعنداش
اللي وجعتني انه مافيش من يمر يقوله حتى صباح الخير ولو قالوله صباح الخير مش حيقولوله كيف حالك اليوم
كتر خيرهم لو قامو ايدهم ونزلوها على اساس السلام عليكم .
وهنا استوقفتني حاجة علاش حنا كمسلمين مش مهتمين بالناس اللي عندهم مشكلة زي هذي يعني لازم يا يكون ضعيف سمع باش يعرف يتكلم معاه يا مايلقاش من يقوله خير؟؟؟
تبو تعرفو لشن نبي نوصل ؟ نبي نوصل علاش زي مافي حصة رسم ورياضة وموسيقى واللي مادرنا بيهم شي إلا التهدريز ومضيعة الوقت ماتنزلش حصة لتعليم لغة الاشارة ( حاجات اهم يعني) انا مانبيش نبالغ ونقول نتعلمو كل اللغة بس عالاقل الاساسيات , يعني شن بنخسرو لو نتعلمو نقولولهم صباح الخير, كيف حالك , متلا اسماء بلدان , اعضاء الجسم , الفاكهة , الخضروات يعني نوع من التعاون معاهم لتسهيل طرق تعاملهم واحتكاكهم بالناس , وعموما هما مش خاسرين شي حنا اللي لو حسينا بنوع من التكبر عليهم وتجاهلناهم حنخسرو ونخسرو هلبا ,, وربي في الوجود .
أنا ماعندي مانقول إلا إني نتمنى ان شي زي هذا يصير ونكونو سباقين لفعل الخير ومش لازم لين اديره قبلنا ألف دولة علاش مانكونوش أول ناس نحسو بغيرنا حنا مسلمين والقلوب الطيبة عندنا هلبا , وزي ماقلتلكم هذي وجهة نظري للموضوع ونتمنى نستقبل وجهات نظر مساندة وتقدر ادير شي والسلام عليكم ورحمة الله وباركاته..
